AinMetThu

Thursday, July 12, 2007


ပထမဆုံးနဲ့နောက်ဆုံး


ပထမဆုံးနဲ့နောက်ဆုံးတသက်မှာတခါဘဲလုပ်ဘူးတဲ့ကိစ္စဆိုတာ
လူတိုင်းမှာ အနည်းနဲ့ အများတော့ရှိကြမယ်ထင်ပါတယ်။
အဲဒီလိုဘဲ၊ ကျွန်တော့်မှာလဲ တချို့ရှိပါတယ်။
အဲဒီထဲက တခုပါ
တသက်မှာတခါဆိုတော့ ဒီဘ၀မဆုံးခင်မှာ နောက်တခါဖြစ်နိုင်ခြေ ရှိနေပါသေးတယ်။
ကျွန်တော့်ရဲ့ အခုကိစ္စကတော့ နောက်တခါဆိုတာမရှိနိုင်တော့ပါဘူး။

ဒီလိုပါ--ကျွန်တော့်တသက်မှာတခါဘဲ ရုပ်ရှင်သရုပ်ဆောင်တယောက်ဆီကို
စာရေးခဲ့ဘူးပါတယ်။
ပြောရရင်ရုပ်ရှင်ထဲက ဇတ်ကောင်“ကိုတူး”ဆီကို ရေးတာပါ။
အဲဒီအချိန်ကကျွန်တော်၁၆နှစ်သား၊
အနုပညာကိုစိတ်ဝင်စားတဲ့ချာတိတ်လေးတယောက်ပေါ့။
မလွန်ဆန်နိုင်တဲ့လက်တွေ့ဘ၀ကိုမေ့ထားနိုင်ဖို့ စိတ်ကူးယဉ်ဘ၀တခုကို
အိပ်မက်ထဲမှာ တည်ထောင်ထားတဲ့အချိန်။
ကိုယ့်စိတ်ကြိုက်ဖြစ်မလာတိုင်းလောကကြီးကိုဘဲဗလိုင်းကြီး အပြစ်တွေဖို့နေခဲ့တဲ့အချိန်။
အဲဒီလိုအချိန်မှာ သူသရုပ်ဆောင်ထားတဲ့ရုပ်ရှင်ကားရုံတင်ခဲ့တယ်။
ပိုစတာကိုကြိုက်လို့၊ ဒါရိုက်တာကို စိတ်ဝင်စားလို့ဆိုတဲ့
အကြောင်းကြောင်းကြောင့် ကြည့်ဖြစ်ခဲ့တယ်။
ပတ်ဝန်းကျင်က အမှတ်တမဲ့လစ်လျူရှုတာကို ခံခဲ့ရပြီး အချစ်ငတ်ခဲ့တဲ့မောင်နှမလေးတွေ
အကြောင်းရိုက်ထားတဲ့ ဇတ်လမ်းထဲက “ကိုတူး”ရဲ့အဖြစ်နဲ့ကိုယ့်အဖြစ်ဟာ နဲနဲမှ
မနီးစပ်ပါဘဲနဲ့အရမ်းကိုခံစားခဲ့ရတယ်။
ရုပ်ရှင်တကားကိုရုံတင်နေတုန်းမှာတင်အကြိမ်ကြိမ် ကြည်တဲ့အကျင့်ကို ပထမဦးဆုံးရခဲ့တယ်။(ဗွီဒီယိုတွေမပေါ်သေးခင်ခေတ်မို့)
ကြည့်တိုင်းလဲမျက်ရည်ကျခဲ့ရပါတယ်။သူသရုပ်ဆောင်တာကောင်းတယ်လို့တော့
မဆိုနိုင် ပါဘူး၊အဲဒီအချိန်က ရှိလှမှ၁၄နှစ်သားပေါ့။(ကျွန်တော့်အထင်)
ပထမဦးဆုံးအဓိကဇတ်ဆောင်အဖြစ်ရိုက်တဲ့ရုပ်ရှင်၊ဇတ်လမ်းကမိသားစုအကြောင်း၊
ကျန်တဲ့သရုပ်ဆောင်အများစုကလဲတကယ့်သူ့ဆွေမျိုးသားချင်းတွေ၊
ဒီတော့သဘာဝကျတယ်လို့ တော့ပြောနိုင်ပါတယ်။
ရုပ်ရှင်ထဲမှာ သူက ဒိုင်ယာလော့ခ်တွေအများကြီး ပြောမသွားဘူး၊
အကယ်ဒမီရှော့တ်အိုက်တင်တွေလဲအပီအပြင် ပေးမသွားပါဘူး။
အဲဒီရုပ်ရှင်ရုံတင်နေတုန်းကအမြဲတမ်းလူချောင်နေတာကိုဘဲကြည့်တော့။
ဒါပေမဲ့ ကျွန်တော် ၇ခါ ကြည့်ဖြစ်ခဲ့ပါတယ်။
နောက်ဆုံးမှာတော့သူ့ဆီကို(“ကိုတူး”ဆီကို)စာရေးဖြစ်လိုက်ပါတယ်။
စာထဲမှာ “ကိုတူး”ရဲ့ ခံစားချက်ကိုကျွန်တော်နားလည်တဲ့အကြောင်းရေးခဲ့ပါတယ်။
မကြာခင်မှာသူ့ဆီကစာပြန်လာပါတယ်။ ထွေထွေထူးထူးတော့မဟုတ်ပါဘူး။ကျေးဇူးတင်တဲ့အကြောင်း၊
နောက်လဲအားပေးပါဆိုတဲ့ အကြောင်း တမျက်နှာလောက်ရှိတဲ့စာလေးတစောင်ပါ။
ကိုယ်ပြောချင်တာတွေပြောလိုက်ခဲ့ပြီးပြီမို့
ကျွန်တော်သူ့ဆီကိုစာထပ်မရေးဖြစ်ပါဘူး။သူကရုပ်ရှင်ဆက်မရိုက်ခဲ့ဘူး။
ဒီလိုနဲ့လက်တွေ့ဘ၀ထဲမှာ လုံးလည်လိုက်ရင်းအသက်တွေကြီးလာခဲ့ပါတယ်။ ကျွန်တော်လဲနိုင်ငံခြားကိုရောက်လာခဲ့ပါတယ်။
အဲဒီအချိန်မှာသူ နံမည်သစ်တခုနဲ့ ရုပ်ရှင်တွေ ရိုက်လာပါတယ်။ အရမ်းအောင်မြင်လာတယ်။ဒါပေမဲ့ နံမည်သစ်နဲ့သူ့ရုပ်ရှင်ကားကိုတကားမှ ကျွန်တော်ကောင်းကောင်းမကြည့်ဖြစ်ပါဘူး။
ပြောရရင်သူ့ဆီကိုစာထပ်ရေးဖို့အကြောင်းလဲမရှိပါဘူး။
ကလေးဘ၀ကစာလေးတစောင်ကို
သူလဲမေ့သွား မှာဖြစ်သလို ကျွန်တော်လဲမေ့ထားလိုက်တယ်ဆိုပါတော့။
ဒါပေမဲ့တခါတခါ မြန်မာပြည်ကို၊ ငယ်စဉ်ဘ၀ကို၊ပြန်တွေးမိတဲ့အခါမျိုးမှာတော့
သူ့အကြောင်းကို ဖျပ်ကနဲ သတိရမိပါတယ်။တကယ်လို့များ အခွင့်သင့်ရင်
အရင်က “ကိုတူး” ဖြစ်ခဲ့တဲ့သူနဲ့ အခုထိလဲ ကျွန်တော်ဖြစ်နေဆဲ ကျွန်တော်
ဘ၀အကြောင်းတွေကို စကားစမြည် ပြောကြည့်ချင်တာမျိုးတော့ဖြစ်မိပါတယ်။
လူ့ဘ၀ဆိုတာ ကြိုတင်ခန့်မှန်းလို့မရနိုင်ဘူးမဟုတ်လား။
တချိန်ချိန်မှာအခွင့်သင့်လာနိုင်တယ်လေ။မျှော်လင့်ချက်ဆိုတာမျိုးတော့မဟုတ်ပါဘူး။
ဆန္ဒ အိပ်မက်၊ အာသီသ သက်သက်ပါ။
ဒီနေ့ သူ ရုတ်တရက် သေဆုံးသွားပြီဆိုတဲ့သတင်းကိုကြားလိုက်ရပါတယ်။ နှလုံးရောဂါတဲ့။
အရင်ကကျွန်တော်၇ခါပြန်ကြည့်ခဲ့တဲ့ ရုပ်ရှင်ထဲမှာ“ကိုတူး”ဟာ
သစ်ပင်ပေါ်က လိမ့်ကျပြီးသေဆုံးခဲ့ပါတယ်။
ကျွန်တော်အမြဲမျက်ရည်ကျခဲ့ရတဲ့ ဇတ်သိမ်းခန်းမှာသူက
နှင်းဆီပန်းတပွင့်ကိုင်ထားတဲ့ လက်ကိုလှမ်းပြီး“မမကြီး ...ပန်း” လို့ ကမ်းပေးနေလေရဲ့၊
သူမျက်နှာတခုလုံး အပြုံးတွေနဲ့၊
ကျွန်တော့်အိပ်မက်တခုလဲ ဆုံးလေခဲ့ပေါ့၊
(သူ့နာရေးသတင်းကိုဖတ်ရတော့မှသူဟာကျွန်တော်နဲ့သက်တူရွယ်တူမှန်းသိလိုက်ရ
ပါတယ်။)

0 Comments:

Post a Comment

<< Home